Қазіргі жаһандану дәуірінде қоғамның рухани тұтастығын сақтау – ең өзекті мәселелердің бірі. Әсіресе, түрлі идеологиялық ағымдар мен ақпараттық ықпалдар күшейген заманда дәстүрлі рухани құндылықтардың маңызы арта түсуде. Өйткені, ғасырлар бойы қалыптасқан ұлттық және діни құндылықтар – халықтың дүниетанымы мен өмір салтының өзегін құрайтын басты тірек.
Дәстүрлі рухани құндылықтар дегеніміз – ата-бабадан мирас болып қалған, ұлттың мәдениетімен, тарихымен және дінімен тығыз байланысты ұғымдар жиынтығы. Оларға үлкенді құрметтеу, кішіге ізет көрсету, отбасы бірлігін сақтау, адалдық, сабырлылық, жауапкершілік сияқты қасиеттер жатады. Бұл құндылықтар қоғамдағы үйлесімділікті сақтап, адамдар арасындағы өзара сенім мен сыйластықты нығайтады.
Дін де осы рухани құндылықтардың маңызды құрамдас бөлігі болып табылады. Дәстүрлі дін – қоғамда бейбітшілік пен тұрақтылықты насихаттайтын, адамды ізгілікке, мейірімділікке және жауапкершілікке тәрбиелейтін күш. Дұрыс діни түсінік қалыптасқан ортада радикалды көзқарастар мен деструктивті идеологияларға орын болмайды. Сондықтан діни сауаттылықты арттыру және дәстүрлі діни танымды нығайту – қоғам қауіпсіздігінің маңызды шарты.
Бүгінде кейбір теріс идеологиялық ықпал етуші топтар жастардың санасына әсер ету арқылы оларды өз қатарларына тартуға тырысуда. Мұндай жағдайда сыни ойлау қабілетінің маңызы ерекше. Сыни ойлай алатын адам кез келген ақпаратты сүзгіден өткізіп, оның шынайылығын саралай алады. Бұл – жалған діни насихатқа қарсы тұрудың тиімді жолдарының бірі.
Сонымен қатар, отбасы мен білім беру жүйесінің рөлі де айрықша. Отбасында берілген тәрбие, ұлттық салт-дәстүрлерге құрмет, дұрыс діни түсінік – тұлғаның қалыптасуына тікелей әсер етеді. Ал білім беру ұйымдары жастарға тек білім беріп қана қоймай, оларды рухани тұрғыда тәрбиелеуге де назар аударуы тиіс.
Қорытындылай келе, дәстүрлі рухани құндылықтар – қоғамның тұрақтылығы мен бірлігінің кепілі. Олар адамды адасудан сақтап, дұрыс жолды таңдауға бағыттайды. Сондықтан әрбір азамат осы құндылықтарды сақтап, насихаттауға өз үлесін қосуы қажет. Рухани тұрғыдан бай, саналы қоғам ғана сыртқы және ішкі қауіптерге төтеп бере алады.

"Әлеуметтік зерделеу және қоғаммен байланыс" бөлімінің басшысы Г.Орынбаева