Мешіт – мұсылман қауымы үшін қасиетті де қастерлі орын. Ол – Алланың үйі, құлшылық жасайтын, рухани тынығатын, тәрбие мен тағылым алатын мекен. Сондықтан мешітке келген әрбір жан оның ішкі тәртібін сақтауға, әдеп пен тазалық қағидаларын ұстануға міндетті.
Ең алдымен, мешітке кірген адам ниетін түзеп, Алла разылығы үшін келгенін жүрегімен сезінуі қажет. Мешітке оң аяқпен кіріп, арнайы дұға оқу – Пайғамбарымыз Мұхаммедтің (с.ғ.с.) сүннеті. Бұл – мұсылманның әрбір ісінде әдептілік пен тәртіптілікті ұстануының көрінісі.
Мешіттің ішкі тәртібіндегі басты талаптардың бірі – тазалық. Құлшылық орны болғандықтан, мешіттің іші-сырты таза болуы шарт. Жамағат та өз кезегінде киімінің, денесінің тазалығына мән беруі тиіс. Жағымсыз иістермен (темекі, сарымсақ, пияз т.б.) мешітке келу – жамағатқа қолайсыздық туғызатын әрекет. Сондықтан әрбір мұсылман айналасындағы адамдардың құқығын ескергені жөн. Мешіт ішінде тәртіп сақтау – имандылықтың белгісі. Дауысты көтеріп сөйлеу, орынсыз күлу, телефонмен қатты сөйлесу – мешіт әдебіне қайшы. Қасиетті орында тыныштық сақталып, әрбір адам өз құлшылығына кедергі келтірмейтіндей әрекет етуі тиіс. Ұялы телефондарды сөндіріп немесе дыбыссыз режимге қою – қарапайым, бірақ маңызды талаптардың бірі.
Сонымен қатар, мешітте жамағатпен намаз оқу кезінде сап түзеп, бір-біріне құрмет көрсету де аса маңызды. Алдыңғы қатарға өту үшін итеріскен, өзгелердің құлшылығына кедергі жасау – дұрыс емес. Ислам діні тәртіп пен ұйымшылдықты жоғары бағалайды. Сондықтан әрбір жамағат мүшесі имамның нұсқауына құлақ асып, бірлікпен әрекет етуі қажет.
Мешіт – тек намаз оқитын орын ғана емес, сондай-ақ білім мен тәрбие ордасы. Мұнда діни дәрістер, уағыз-насихаттар өткізіледі. Осындай жиындарда да тәртіп сақталып, тыңдаушы мәдениеті қалыптасуы керек. Сөз бөлмеу, өзгелерге кедергі келтірмеу – ізгі мінездің көрінісі. Балалар мәселесіне де ерекше көңіл бөлінгені жөн. Мешітке келген жас буынға дұрыс тәрбие беру – баршамыздың міндетіміз. Балаларды мешіт әдебіне үйретіп, олардың шуламай, тәртіп сақтауына баулу қажет. Бұл – олардың болашақтағы иманды, саналы азамат болып қалыптасуына ықпал етеді.
Мешіт мүлкіне ұқыптылықпен қарау да – маңызды міндет. Кітаптарды ретімен пайдалану, аяқ киімді белгіленген орынға қою, тазалықты сақтау – жамағаттың ортақ жауапкершілігі. Әрбір адам мешітті өз үйіндей көріп, оған құрметпен қарауы тиіс.
Мешіттің ішкі тәртібі – бұл тек ережелер жиынтығы емес, ол мұсылманның рухани мәдениеті мен тәрбиесінің айнасы. Әрбір жамағат мүшесі осы талаптарды сақтай отырып, мешіттің қасиетін арттырып, қоғамда ізгілік пен бірліктің нығаюына үлес қоса алады.

Болатбек Абу
Атырау облысының бас имамы